Ciidamada
DFKG ah ee Soomaaliya iyo kuwa Ethiopia oo ka carraabay gobolka
GEDO, iyaga oo u ambaqaaday dhinaca gobolka Baay
Buurdhuubo, Wararka aanu ka helayno magaalada
buurdhuubo ee Gobolka Gedo ayaa sheegaya in ay halkaasi ka sii
saanqaadeen ciidamadii dowlada iyo kuwa dalka Ethiopia oo
isgarabsanayey kaddib markii ay soo afmeereen socdaal-baadi-goob
ah oo ay ka wadeen gobolkan Gedo.
Ciidamadan Huwanta ah oo ku hubeysnaa noocyada kala duwan ee
hubka ayaa lagu soo warbixinayaa inay xalay ku
waabariisteen duleedka magaalada Buurdhuubo, iyaga oo saakana
halkaasi ka sii ambaqaaday safarkoodii ay ugu jiheysnaayeen
qeybo kamid ah gobolka Baay oo ay horay in muddo ah xeryo ciidan
ku lahaa.
Askartan oo shalay ka soo guuray magaalada xarunta u ah gobolkan
ee Garbahaarrey, halkaasoo ay ku sugnaayeen dhawr cisho ayaa la
sheegayaa in ay imminka soo gunaanadeen socdaalkoodii,ayadoo
kulamo aan toos ahayn oo ay la qaateen waxgaradka degaankaasina
ku wargeliyey inay aad uga mahadnaqayaan soodhaweynta baaxadda
leh oo ay kala kulmeen shacabka iyo masuuliyiinta gobolka.
Ciidankan oo si xooggan u hubaysan ayaa u dhaxeeyey
magaalooyinka Ceelcadde, Garbahaarey iyo Buurdhuubo tan
iyo intii ay maxkamadbeeleedyadii Muqdishu looga itaalroonaaday
aagaggii ay ka talin jireen. Ujeeddada ciidankani ugu dul
meeraysanayey magaalooyinkan ayaa la rumeysanyahay inay la
xiriirtay baadi goob ballaaran oo ay ugu jireen xubno
maxkamadaha ah oo sida ay sheegayeen ay uga shakiyeen inay ku
dhuumaalaysanayaan gobolka. Hase ahaatee ciidamadan ayaan wax
caddeyn ah ka helin goobihii ay booqdeen sida ay ii xaqiijiyeen
dad aan kala xiriiray degaano badan oo kamid ah gobolka.
