Beled Xaawo, Boqollaal dadweyne ah oo ku qeylinayay
halkudhigyo iyo astaamo ka dhan ah xariga dhawaan magaalada
Baydhabo loogu geystay mid ka mid ah dadka degaanka gobolka
Gedo, agaasime Cali Xassan Baldhaf xill uu ku soo socdaalayey
dhabbaha xiriiriya B/xaawo iyo Muqdisho.
Dibadbaxaan oo ay soo agaasimeen ururrada bulshada rayidka ah
ee degaankaasi ayaa dadweynihii ka qeybgalay waxa ay
socdaal lug ah ku soo mareen mudadii ay dhigayeen
banaanbaxaasi dhammaan xaafadaha magaalada, waxaana ay
dadkaasi oo ay caro ka muuqatay la ku dhawaaqayeen oraahyo
muujinaya dambi la'aanta agaasimaha hormuud iyo in aan la
xirin qof aan dambi lahayn.
Guddoomiyaha ururrlada dhalinyarada degaankaasi Max'ed Daqarre
oo igula soo xiriiray qadka isgaarsiinta ayaa sheegay inay aad
uga xunyihiin xariga muwaadinkaasi , waxaana uu ka codsaday
dowlada ku meel gaar ah iyo ummadda soomaaliyeed inay ka
qeyb qaataan sii deynta ninkaasi.
Agaasimaha Shirkadda Isgaarsiinta Hormuud Cali Xassan Baldhaf
gaar ahaan xafiiskeeda B/xaawo ayaa waxaa muddo haatan laga
joogo 4 maalmood waxaa xarig ugu geystay magaalada Baydhabo
ciidamada isku dhafan oo qaarkodd loo aqoonsaday kuwa Ehoipia,
waxaana xilliga xariggaasi Cali Xassan oo safar kaga
yimid Xajka uu ku soo jeeday magaalada Beled xaawo oo ah
halka uu ka hawlgeli jiray.
Xariga Cali Xassan Baldhaf ayaa waxaa sidoo kale cambaareeyey
qaar ka mid ah waxgaradka , odayaasha iyo culummaa'udiinka
gobolka Gedo. Waxaa ay ugu dambeyntii ugu baaqeen dowladda
inay sii deyso muwaadinkaasi.
Xarigga agaasimaha Hormuud ayaa ku soo beegmay xilli
sharciyada waddanka oo dhan la galiyey xaalad deg deg ah oo
madaxweyne Cabdullaahi Yuusuf oo kaliya uu hadalkiisu yahay
sharciga kaliya ee ciidanka dawladda ku meelgaarka ah iyo kuwa
Ethoipiankuba ku hawlgalayaan.
